ZRA-EC in Tuimang te Rs/200,000

Tuimangte Sih hehmah lo dia

Thatang suang, kampau hoihlo zang uh aci ten na ngai un. Maikum ah Lo ka vatna ding mun uh Mauvom te Pa Thangpek bek in Tuimang gam nungkum November kha in vat hi. Tuimang hausa mintawh thudam in na vat nawn kei in kicici aa, zum ki tunlo hi. Na vat teitei ahih manin kici kik leuleu aa, aman ZVC ( Zogam Vaihawm Committee, Cikha) zum ah hong khia zawsop hi.

ZVC ten Tuimang leh Mauvom te hong sam aa, Gam gi lai gina tak in en aa, khensat ziau ding pen, Mauvom ten na zo khin uh hilo dia, a phual ah Gi suang en dingin khua khat pan mi 6 sam uhhi. Tuimangte gamlai dal umlo aa, gamgi suang en in a pai ZVC te athuman keileh cih bangin Mipi te kampau khauh mah hi. Gamgi suang mu khinta, gamgi en khinta, Mauvom te kiangah zong thudot dingteng dong uh, pau theilo uh, gamgi suang mit muh in om ahih manin, hih banga ki neubawl ci in mipite ki sih hehmah hi. Thuman bangin a khen nak uhleh ZVC te adingin zong hehnang thuzong om vetlo hi. ZVC ten sum duhlua deuhsam hi.

ZRA-EC ten India sum Rs/200,000 ( tengnih) Tuimangte hong liausak hi. Ahang pen mipi ten Thangpek na vua kha, sisan naisan a suah cihzong hikei ee, ZVC te kiangah gamgi suang mu khinta Thumanlo in thu na khen ding uhleh cih bangin kampau hoihlo na zangh mah uh, Thagum leh kampau hoihlo zat man Liausum ZRA-EC ten India sum Rs/200,000 a ngam uh aa, Tuimang khua makai ten athum uhteh Rs/150,000 cihtawh ki lemna ding na geel uhhi. Hihpen Gamgi vai hi nawnlo kampau leh thagum suanna hang hi.

Pa Thangpek leh ZVC ten ZRA-EC tungah kampau, khut khial te na teng hong khia uh aa, ZRA-EC ten na Nih tuak un ki lemna na bawl unla, na ki lemzawh kei uhleh Laiusum cih dan khatzong ki ho na om masa leh hoih ding hi aa, Tuimang te mawhsak in Liausak cihpen ki lungkimzolo hi. Gamgi vai thu manlo aom manin kampau ki khauh, thatang ki suang kha suak ahih manin, Thatang suanvai leh kampau hoihlo vai Zongeina tawh ki thum masak masa in hileng alem ding hiven.

Mauvom in Tuimangte Lo gam Singkung bangzah phuk aa, zawhthawh thutawh hih bangin hih cihpen Tuimang khuami khempeuh ki lungkimlo hi. ZRA-EC tenzong Mauvom te gamgi lai leh Tuimangte gamgi lai en aa, Mauvom te Lo vatna mun Mauvom te ah ahihkei leh Liausum hong piaksak pah ding uh hiam cih nop huai hi.

Tuimang ten Lo gam ki neih in, ko khua leh ko khua zong, mi Lo gam pen ki vatsaklo hi ung. Tuimang gam sungah Lo gi suang cihte ki phut dimdem hi. Lo zong ki mawk neihlo aa, Inn meikhu in ki pai ciatciat khua hi. Lo gamgi vai zong Tuimang Hausa laibupi sungah om dimdem hi.

Mauvom te Tuimang gam hong tuh hangin hong zo ngeilo bangzah vei hong tuh aki cingin hiah ki sim thei hi👇

https://tuimangvontawi.blogspot.com/2026/04/tuimang-te-gam-mauvom-ten-atuhna.html?m=1 

#Tuimang

#ZRA

#ZVC