ATHU: TUIMANG LE MAUVOM GAMGI VAI THUSUAHNA
Leitung mun tuamtuam a om Zomite tungah Tuimang le Mauvom gamgi vai thusuah na kong nei uh hi. Mangkang Kumpi in Zogam ah Ukpi sem dingin akipsak kum 40 (1894-1934) sung kizom ukpi a sem Pu Hau Cin Khup in 1896 kumin Tuimang khua gamgi hong bawlsak khin hi. Tua hong bawlsak gamgi, gamlai/gamlim Mangkang kumpi tungah a ki puak masa pengamlim (original gamlim) ahi hi. Tua a kipan in logam in kineito den in, tuni ciang dong Tuimang in ki kho den hi.
Ko Tuimangte’n Innmun logam a thupisakte ka hi uh a, tua mah bangin inn huang ahi zongin, lo gamgi suangte hoihtak in, a phut sitset khuate ka hi uh hi. Tuimang khua kisat a kipan tuni dong logam a kinei ciat hi a, khua dang pawlkhatte dan in lo khawhna mun dingte, mee sawk in lo gam a teelte ka hi kei uh hi. Pu le Pa hun pek a kipan Tuimang khua in, Pupa logam (ကိုယ်ပိုင်ေြမ) a nei dimdem khua ka hi uh hi. Tua bang hi napi in, Mauvomte’n Tuimang gam hong tuh zelzel uh hi. Mauvomte’n Tuimang gam a nunung pen hong tuhna uh tawh kisai in, 2005 kum in Kumpi thu khensatna a om khit nungin, Tuimang le Mauvom gamgi vai buaina cih a om ngei nawnlo ahi hi.
April 2026 Tuimang le Mauvom Gamgi Buai Kipatna
2026 kum lokhawhna tawh kisai in, Mauvomte‘n a lo hawm na-uh, Tuimang gam lam ah lociing 2 ( Inn 2) hong vat sak uhhi. Hih thu a kitheih ciangin, Tuimang Hausate’n kamtawh ahi zongin, Lai tawh ahi zongin thu zasak pah a, Tuimang gam sung lo vatte a khawlna dingun gen uh hi. Tua ciangin Mauvom Hausa Pa Dai Khan Suut le ZYA Makaipi Pa Go Khup Mang te Tuimang gam lo vatsak khakna hangin, a vai thuum dingin Feb 15, 2026 ni-in Tuimang ah pai uh hi. Tuimang Hausapa khualzin ahih manin Hausapa hong tun teh hong pai kik un ci-in ki ciahsak kik hi. Tuimang Hausapa khua a tun ciangin Mauvomte kiangah lovatna vai kiho dingin hong paikik un ci-in ki vai khak hi. Mauvomte Tuimang lam pai nawnloin Pa Thangpek (Mauvom) makaihna tawh Zogam Vaihawm Committee zum Cikha pai in,Tuimang gam tuhna LAI ( တိုင်စာ) na khia zawsop uh hi. A thuum dingin Tuimang khua a paikhinsa a bang hangin hi bangin kalsuan zawsop cih pen lamdang kisa mahmah hi.
Pa Thangpek maikaihna tawh ZVC ah Tuimang gam tuhna lai aki khiatna hangin, ZVC in Tuimangte a sapna tungtawn in, April 13, 2026 ni-in Tuimangte ZVC, Cikha ah pai uh hi. Tua lai ah Tuimang pan a pai upa, makaite’n abeisa Tuimang le Mauvom gam kituhna le Tuimangte zawhna laipi teng pua-in tuate ZVC tungah lak thei hi. Ahih hangin ZVC te’n tua laite (documents) thudon sak lo uh hi. Tua ban ah ZVC te’n khua veng Hausa Luangel leh Vaivette zong sam in, Tuimang le Mauvom gamgi vai tawh kisai in, thu dotna nei uh hi. Luangel le Vaivet Hausate‘n hih buaina gamnei pen Tuimangte gam ahih na thu limtak in gen thei uh hi. Tua bang hi napi in, ZVC te‘n hih Hausate thugenna thusimsak lo uh hi.
Tua ban ah, Mauvomte’n Lai Siangtho nam a kiciamna neih ding thu a gen uh ciangin, ko
Tuimang khua te’n zong kiciamna neih ding ka lungkim uh hi. Ahih hangin ZVC zum pan
makaite’n kiciamna neih ding lemsalo uh hi. Thugen tuahna teng aki man khit ciangin ZVC
Makaite, Mauvom ten’ Tuimangte a tuhna munlegam, a phual ah pai dingin, thukhensatna nei uh hi. April 14, 2026 ni-in Mauvomte’n Tuimangte gam a tuhna amun en dingin ZVC makaite leh Mauvom te tonkhawm in hong pai uh hi.
Tuimang panin mi 6 pai ding ahih hangin, khuazang in Pulepa gam ahihna thei sitset ka ahih manun hehlua in mi 100 val bang thu ngai dingin kipai hi. Tua lai mun ah mipi khangno pawlkhat heh lua uh a, khut tum le kampau khial om kha mah ta leh, kiphelh in, ki phelhzo hi.
Tua ni in ZVC makaite in, Hih mun pen Tuimang gam hi, ci in tangkona kician tak in nei hi.
Tua bang hina pi in, ZVC makaite Cikha zum a tun kik ciang un, thulela kilamdang a, “Ko hih
gamgi vai mawhpuak la zo nawnlo ka hihman un ka khut uh ka sil uh hi ci-in,“ ZRA-EC tungah Tuimang le Mauvom gamgi vai apna nei uh hi.
Leitung bup Tuimang Vontawi Kipawlna in ZVC le ZRA-EC Khensatna tawh kisai Thumanlo ahihna leh ka Thukimlohna uh kong tangko khia uh hi.
Bang hang hiam cih leh,
1. ZVC le ZRA-EC in gamgi vai pen ko sep theih hilo hi, hong uk kumpi tawh kisai hi ci napi-in, khawhtheihloh (တားြမစ်နယ်ေြမ) dingin hong koih sak mawk uhahih man un, thuman ka sakei uh hi.
2. Khut khial ci in, a lo-gam nei Tuimangte Rs.150,000 (MMK. 6,750,000 Kyats, teng 67
leh tul 50 ) hong kiliausak mawk hi. A khut khial taktak mi lo-gam ngetloh in avatsak Mauvom khuate aliau ding hizaw lo ding hiam? Hih khensatna zong thumanlo, langlek in, human right violation leh discrimination ahi hi.
3. Zo ngeina ah khut khialhna khat a om leh sisan kiluanin gan si tawh kithuumna kibawl
hi.a, Tuimangte logam a khawhsawm, Mauvomte a thuum ding akizo khinsa kimlai, bang hangin ZVC office ah တိုင်စာ tun zawsop thei hiam? ZVC in kilemna a bawl ding kimlai thu hong sosang sak hizaw hi ci in tuipi gal Tuimang Vontawi USA in kong ciamteh uh hi.
4. April 15, 2026 ni a, ZRA-EC leh ZVC thukhensatna pen Myanmar Government 2005 kuma, kumpi thu khensatsa tawh akileh bulh in hong gamta nahih manun, no tungah thu a khen dingin leitung bup Zomi khempeuh leh Central ZRA Office tungah hih thu tawh kisai a kilawm bangin vai nong vansakna dingun zahtakna lianpi tawh kong zasak uh hi.
5. Mauvom khua hausa te leh Pa Thangpek a ngongtatna in, Mauvom khuazang a minsiasak hilel hi. Makai pawl khat ngongtatna hangin khua nih hong nawngkaisakte thuhilh huai mahmah zaw hi. Ih minam, ih gam akem, ahung, acing ih hih manin khua khat leh khat kisiatloh theihtheih na dingin hanciam huai mahmah zaw hi.
Tuipi gal ah a om Tuimang vontawi khempeuh ( USA, Australia, Malaysia) in lung
kituak takin hong tangko ka hi uhhi.
Kipawlna Aitangin,
Pa Tuan Muan Dam
President
Pa Go Suan Muang
Secretary
Statement Date: April 21, 2026
0 comments:
Post a Comment